Велікапольска-Мазавецкая правінцыя Таварыства Езуса ў гэтым годзе адзначае стагоддзе свайго існавання. 15 жніўня 1926 года ў Варшаве польскія езуіты былі падзелены на дзве незалежныя правінцыі, якія працягваюць функцыянаваць і дагэтуль. Да таго часу яны ўваходзілі ў адзіную Польскую правінцыю, якая з 1918 года дзейнічала на тэрыторыі адроджанай Польскай дзяржавы. Гады 1916-1926 “былі гадамі вялікага пашырэння для былых «галіцкіх» езуітаў»”, – чытаем у справаздачы за 1926 год. Было заснавана шмат новых супольнасцяў у розных месцах. Езуіты вярнуліся да сваёй апостальскай працы і заснавалі новыя. Гэта дынамічнае развіццё прывяло да рашэння падзяліць правінцыю на Малапольскую правінцыю (PME) і Велікапольска-Мазавецкую правінцыю (PMA).
Юбілейны час – гэта не толькі магчымасць падвесці вынікі, але і зазірнуць у будучыню. На гэты год запланавана шмат юбілейных мерапрыемстваў, за якімі можна сачыць на адмыслова створаным сайце: https://100pma.jezuici.pl/ Запланавана акадэмічная канферэнцыя ў Кракаве з удзелам айца генерала Артура Сосы, SJ, а таксама сустрэчы з айцом генералам у Варшаве, форум для супрацоўнікаў, супольныя рэкалекцыі і многае іншае.
3 студзеня ў Лодзі сабраліся езуіты з Велікапольска-Мазавецкай правінцыі Таварыства Езуса, каб адзначыць пачатак года, прысвечанага заснаванню правінцыі, у санктуарыі Найсвяцейшага Імя Езуса. На ўрачыстасці прысутнічалі таксама маладыя езуіты з Паўднёвапольскай правінцыі і дэкан мясцовага дэканату, манахіні, якія гадамі супрацоўнічаюць з езуітамі ў Лодзі, і шматлікія свецкія вернікі.
Святую Імшу ўзначаліў айцец правінцыял Збігнеў Лячкоўскі SJ, які нагадаў пра значэнне падвойнага святкавання (адкрыццё юбілею правінцыі ў тытулярнае свята Таварыства), а пропаведзь прамовіў айцец Роберт Данілюк SJ, эксперт па гісторыі ордэна езуітаў. Музычнае суправаджэнне літургіі забяспечыў ансамбль “Mocni w Duchu”.
“Юбілейны 2026 год для нас, езуітаў, – гэта не толькі ўспамін і святкаванне апошніх ста гадоў нашай гісторыі, але і час духоўнага абнаўлення. Ён нагадвае нам, што ўсе мы, у тым ліку і вы тут, у Лодзі, удзельнічаем у місіі Езуса Хрыста ў сучасным свеце і хочам, каб Ён паслаў нас”, – сказаў айцец настаяцель на пачатку Імшы.
Айцец Роберт у пропаведзі адзначыў, што ў гэты дзень мы на самай справе святкуем імяніны Пана Езуса. Ён нагадаў пра значэнне Яго імя і распавёў, як святы Ігнацый Лаёла і яго першыя паплечнікі вырашылі назваць сваё Таварыства ў гонар Езуса. Ён згадаў пра цяжкасці, з якімі сутыкнуліся пераемнікі заснавальніка езуітаў у гэтым плане, пра абвінавачванні і ціск з боку тых, хто патрабаваў змены назвы ордэна. “З розных бакоў чуліся заклікі змяніць гэтую назву, якая ўспрымалася як знак пыхі езуітаў, нібы яны імкнуліся ўзвысіць сябе і прэтэндавалі на асаблівае месца ў Касцёле. Тымчасам, як падкрэсліў айцец Лаінес, другі генерал Таварыства, прыняцце такой назвы не было ні прэтэнцыёзнасцю, ні пыхай, а праявай пабожнасці…”.
Пасля літургіі айцец Кшыштаф Алдакоўскі SJ, настаяцель езуіцкай супольнасці ў Лодзі, падзякаваў усім, хто працаваў над тым, каб свята набыло такі ўрачысты характар, і запрасіў усіх прысутных на агапу ў тэатральную залу. Прыгожым і кранальным завяршэннем супольнай малітвы стаў Акт прысвячэння, прачытаны айцом правінцыялам перад Найсвяцейшым Сакрамэнтам, і Літанія да Найсвяцейшага Імя Езуса.
Чарговай падзеяй Юбілейнага года, у адказ на просьбу айца Томаша Кліна SJ, пробашча парафіі святога Ігнацыя Лаёлы і святога Андрэя Баболі ў горадзе Ястшэмбя-Гура, падмацаваную папярэднім адпаведным лістом айца Збігнева Лячкоўскага SJ, стала прызначэнне арцыбіскупам Тадэвушам Войдам SAC парафіяльнага касцёла ў Ястшэмбя-Гуры архідыяцэзіяльным санктуарыем святога Ігнацыя Лаёлы. На вялікую радасць усіх парафіян, якія доўга імкнуліся да гэтага адзначэння, 4 студзеня арцыбіскуп уручыў адпаведны дэкрэт падчас святой Імшы. Дэкрэт мае дату тытулярнага свята Таварыства Езуса. У дэкрэце арцыбіскуп нагадаў, што санктуарый – асаблівае «месца культу і атрымання Божых ласк, з прывілеем даваць поўны адпуст вернікам», якія яго наведваюць.
Па матэрыялах Jezuici.pl
