20 чэрвеня Папа Леў XIV прыняў айца Артура Сосу SJ на аўдыенцыі ў Ватыкане. Сустрэча паміж Святым Айцом і айцом-генералам падкрэслівае глыбокія і гістарычна значныя адносіны паміж Святым Пасадам і Таварыствам Езуса.
Нягледзячы на тое, што падрабязнасці размовы застаюцца ў таямніцы, такія сустрэчы ствараюць магчымасці для непасрэднага дыялогу аб жыцці і місіі Касцёла, асабліва ў дачыненні да Глабальных Апостальскіх прыярытэтаў і працы езуітаў у Касцёле.
Пасля смерці Папы Францішка айцец Соса накіраваў усяму Таварыству ліст, у якім пацвердзіў сваю гатоўнасць прыняць ад Намесніка Хрыста на зямлі «місію, праз якую мы можам прапанаваць як мага лепшае служэнне паўсюднаму Касцёлу». Айцец-генерал падкрэсліў, што гэта «адно з характэрных вымярэнняў харызмы, атрыманай праз святога Ігнацыя і першых айцоў-заснавальнікаў Таварыства Езуса».
Адметнасцю стасункаў паміж Папам і Таварыствам Езуса з’яўляецца іх цесная сувязь з чацвёртым абяцаннем паслухмянасці Святому Айцу адносна місіі. Гэта абяцанне гарантуе, што Таварыства моцна злучана з прыярытэтамі Святога Айца, паколькі мы імкнёмся мужна адказваць на знакі часу і служыць патрэбам свету, захоўваючы вернасць Евангеллю.
